
遍知贝玛嘎波大师教言集PK226ནག་པོ་ཆེན་པོའི་བདུད་བཞི་གཞོམ་པའི་མན་ངག་སྦྱོར་བའི་ཕྲེང་བ་བཞུགསོ།།
18-353
༄༅། །ནག་པོ་ཆེན་པོའི་བདུད་བཞི་གཞོམ་པའི་མན་ངག་སྦྱོར་བའི་ཕྲེང་བ་བཞུགསོ།།
༄། །སྔོན་འགྲོ།
༄༅། །ནག་པོ་ཆེན་པོའི་བདུད་བཞི་གཞོམ་པའི་མན་ངག་སྦྱོར་བའི་ཕྲེང་བ་བཞུགསོ།། ༄༅། །བླ་མ་དམ་པའི་ཞབས་ལ་ཕྱག་འཚལ་ལོ། །
18-354
དཔའ་བོ་རྡོ་རྗེ་སློབ་དཔོན་ཧེ་རུ་ཀའི། །ཞབས་མཐིལ་དྲི་མེད་གདམས་པའི་སེང་གེ་ཡིས། །སྟོབས་ལྡན་བདུད་བཞིའི་ནུས་པ་གླང་པོ་ལ། །བསྣུན་པའི་ཁྲག་བགོས་སྡེར་མོའི་འཕྲེང་འདྲར་འདུད། །མ་འཕྲོགས་སྙིང་རྗེའི་
ནུབ་ཕྱོགས་ཆུ་གཏེར་དུ། །བདག་ཡིད་ཉིན་མོའི་དབང་ཕྱུག་ལྷུང་གྱུར་པ། །དེ་ལས་འཐོར་བའི་ཐིགས་པ་ཁེངས་པ་བཞིན། །གདམས་ངག་སྐར་ཚོགས་དེང་དུས་མཁའ་ལ་ཤར། ། འཇིག་རྟེན་གསུམ་རྣམ་པར་གནོན་པ་བདུད་
བཞིའི་དཔུང་ཕམ་པར་བྱས་ནས། དཔལ་ཧེ་རུ་ཀའི་གོ་འཕང་དུ་འཇུག་པར་འདོད་པ་དག་གིས་ནག་པོ་ཆེན་པོ་ཕྱག་བཞི་པའི་རྫོགས་རིམ་སྦྱོར་བའི་འཕྲེང་བ་འདི་ལ་ནན་ཏན་དུ་བྱའོ། །དེ་ལ།
སྔོན་འགྲོ། དངོས་གཞི། རྗེས་གསུམ་ལས། དང་པོ་ནི། རྒྱ་གར་སྐད་དུ། ཛོ་ག་མཱ་ལ། བོད་སྐད་དུ། སྦྱོར་བའི་འཕྲེང་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བདག་གི་ལྷ་ལ་ཕྱག་འཚལོ། །
བདག་གི་ལྷ་ནི་ཀུན་རྫོབ་དང་དོན་དམ་པས་ཕྱེ་བའི་ནག་པོ་ཆེན་པོ་ཕྱག་བཞི་པ་ཉིད་ལའོ། །ལྷན་སྐྱེས་དྲི་མེད་ལ་དེ་བཞིན། །ཡེ་ཤེས་འཆར་བའི་མན་ངག་ནི། །ཅུང་ཟད་བདག་གིས་བྲི་
བར་བྱ། །བདེ་མཆོག་ལྷན་ཅིག་སྐྱེས་པའི་སྒྲུབ་ཐབས་སུ་ཇི་ལྟར་བཤད་པ་དེ་བཞིན་དུ། ཡེ་ཤེས་ཀྱི་མགོན་པོ་སྒྲུབ་པའི་ཐབས་ལ་བརྟེན་པའི། ཡེ་ཤེས་མྱུར་དུ་འཆར་བར་བྱེད་པའི་མན་ངག་བྲི་བར་བྱའོ། །
18-355
ཞེས་དམ་བཅའ་བར་མཛད་དོ། །དེ་ཡང་དགོས་པ་ཅིའི་ཆེད་དུ་ཞེ་ན། འགྲོ་བ་ཉོན་མོངས་ཀྱིས་བཅིངས་པ། །ཐར་པ་ཉོན་མོངས་འཇིག་བྱེད་པའི། །ཡང་དག་ཡེ་ཤེས་སྦྱོར་གོམས་པས། །དེ་ནི་འཇིག་པར་
འགྱུར་བ་ཡིན། །འགྲོ་བ་ཉོན་མོངས་པ་ལ་སོགས་པའི་བདུད་བཞིས་བཅིངས་པ། ཡང་དག་པའི་ཡེ་ཤེས་ཀྱི་སྦྱོར་བའི་འཕྲེང་བས་འཇིག་པར་བྱས་པ་དེ་ཉིད་དུ་ཐར་པ་རྙེད་པར་འགྱུར་པའི་ཕྱིར་དུའོ། །
དེ་ཡང་། ཡུན་ཆེས་རིང་བས་མ་ཡིན་ཏེ། །འདིར་ནི་རྣལ་འབྱོར་རབ་ཀྱིས་ནི། །ཟླབ་དྲུག་ཏུ་གོམས་པའམ། །ལོ་དང་རྒྱུན་མི་འཆད་པས་ཀྱང་། །ཡང་དག་དངོས་གྲུབ་གཅིག་ཏུ་འགྱུར། །ཞེས་སྨོས་ཤིང་། ཀྱང་ཞེས་
པ་ཚེ་གཅིག་ལ་ངེས་པར་འགྲུབ་བོ་ཞེས་པའི་དོན་ནོ། །དེ་ཡང་། རྣམ་པར་གཡེང་བ་དང་བཅས་པས་མ་ཡིན་ཏེ། སྤྲོས་པ་ཐམས་ཅད་བཏང་ནས་ནི། །རྣལ་འབྱོར་འདོད་པ་རབ་འབད་པས། །འཆད་པར་
འགྱུར་བའི་སྦྱོར་རྣམས་ལ། །གཅིག་ནས་གཟུང་སྟེ་རྣམ་བསྒོམ་བྱ། །དེ་ལྟ་བུའི་བསྒོམ་པའི་ཚུལ་ལ། ཧེ་རུ་ཀ་འདི་ཉིད་ཀྱི་དཀྱིལ་འཁོར་དུ་དབང་བཞི་རྫོགས་པར་ཐོབ་ཅིང་། བསྐྱེད་པའི་རིམ་པ་ལེགས་པར་
ཕྱིན་པའི་རྣལ་འབྱོར་པས། མི་དགེ་བའི་ཆོམ་རྐུན་དང་བསམ་གཏན་གྱི་ཚེར་མས་དབེན་པས། རྒྱུད་ནས་བསྔགས་པའི་གནས་སུ་བདེ་བའི་སྟན་ལ། ལུས་སྐྱིལ་མོ་ཀྲུང་སྒལ་ཚིགས་ལེགས་པར་བསྲངས། ལག་པ་མཉམ་གཞག་གི་ཕྱག་རྒྱ་བཅའ། 
18-356
དཔུང་པ་ཕྱིར་ཡིད་ཙམ་སྒྱེད་ཅིང་། སྟོང་སྒོ་ཤིན་ཏུ་སྦ་བས་མིག་སྣའི་རྩེ་མོ་ལ་མི་བསྒུལ་བར་བལྟ་བར་བྱའོ། །དེ་ནས་ལྷག་པའི་བསམ་པ་རྒྱ་ཆེན་པོས། སྐྱབས་སུ་འགྲོ་བ་དང་སེམས་བསྐྱེད་
པ་སྔོན་དུ་འགྲོ་བས། ཚངས་པའི་གནས་པ་བཞི་ལ་ཡིད་འདྲེ་བར་བྱས་ནས། སྭ་བྷཱ་ཝའི་སྔགས་ཀྱིས་སྟོང་པར་སྦྱངས་པའི་ངང་ལས་རང་སྐད་ཅིག་གིས་དཔལ་ཡེ་ཤེས་ཀྱི་མགོན་པོ་ཕྱག་བཞི་པར་
བསམས་པའི་སྤྱི་བོའི་གཙུག་ཏུ། རྩ་བརྒྱུད་ཀྱི་བླ་མ་ཐམས་ཅད་གཅིག་ཏུ་བསྡུས་པའི་ལྷན་སྐྱེས་ཡབ་ཡུམ་གྱི་སྐུ་ཆུང་དུ་མཐེ་བོང་ཙམ་པ། སྔོ་ཡལ་ལེ། འཛུམ་དམུལ་ལེ་ཅིག་བསྒོམས་ལ། ཕྱི་ནང་
གསང་བ་དེ་ཁོ་ན་ཉིད་ཀྱིས་མཆོད། མོས་གུས་ཀྱི་གདུང་བ་དྲག་པོས། གང་གི་དྲིན་གྱིས་བདེ་ཆེན་ཉིད་ལ་སོགས་པས་བསྟོད། བླ་མ་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་
སེམས་དཀར་དམར་སྤྱི་བོ་ཚངས་པའི་བུ་ག་ནས་རྩ་ཐམས་ཅད་ཀྱི་ནང་དུ་ཞུགས་པས། དམ་ཚིག་ཉམས་ཆག་ཉེས་ལྟུང་སྡིག་སྒྲིབ་ཐམས་ཅད་དུད་ཁུའི་རྣམ་པ་དང་། གདོན་བགེགས་སྦལ་ལྕོང་གི་རྣམ་པར་
ཕྱིར་འཐོན། ལུས་ཐམས་ཅད་བྱང་སེམས་ཀྱིས་གང་ཞིང་དྲི་མ་མེད་པར་ཤེལ་གྱི་གོང་བུ་ལྟ་བུར་བལྟ་བར་བྱ་ཞིང་། མཐར་བླ་མ་རང་ལ་བསྟིམ་མོ།། །།
༄། །དངོས་གཞི།
གཉིས་པ་དངོས་གཞི་ལ། ཉོན་མོངས་པའི་བདུད་གཞོམ་པ་ལས། 
18-357
རླུང་འགོག་པའི་སྦྱོར་བ། ཕུང་པོའི་བདུད་གཞོམ་པ་འཛག་པ་བཅིང་བའི་སྦྱོར་བ། འཆི་བདག་གི་བདུད་གཞོམ་པ་བཅུད་ཀྱིས་ལེན་པའི་སྦྱོར་བ། ལྷའི་བུའི་བདུད་གཞོམ་པ་སྒྱུ་འཕྲུལ་གྱི་སྦྱོར་བ། བདུད་བཞི་
ཅིག་ཅར་དུ་གཞོམ་པ་བཙན་ཐབས་ཀྱི་སྦྱོར་བ་དང་ལྔ་ལས།
༈ ཉོན་མོངས་པའི་བདུད་གཞོམ་པ་ལས། རླུང་འགོག་པའི་སྦྱོར་བ།
དང་པོ་ལ། ལས་རླུང་འགོག་པ་རྡོ་རྗེའི་བཟླས་པ་དང་། ལས་རླུང་བསད་པ་དྷཱུ་ཏཱིར་འཇུག་པའི་མན་ངག་གཉིས་ལས། དང་པོ་ནི།
ཕོ་མོ་མ་ནིང་ཁ་དོག་དང་། །འགྲོ་འོང་གནས་པ་རྣམ་བལྟས་ཏེ། ཞེས་གསུངས་པའི་དོན། གཡས་རྒྱུ་ཕོ། གཡོན་རྒྱུ་མོ། མཉམ་རྒྱུ་མ་ནིང་སྟེ། དེ་དག་གི་ཁ་དོག་དང་། འགྲོ་འོང་གི་རྒྱུ་བ་
ལ་བལྟ་བ་ནི། རླུང་ཇི་ལྟར་འདུག་པ་བཞིན་བཟོ་མེད་པར་འཇོག་པ་སྟེ། དེ་ཡང་། བསྐྱེད་སྡུད་ཀྱི་མཚན་ཉིད་ཅན་ཁམས་ལྔའི་རང་བཞིན་གྱི་སྲོག་རོ་བརྐྱང་གི་དབྱེ་བས། དབྱངས་གསལ་གྱི་བདག་ཉིད་
དུ་གནས་ལ། དེའི་རྒྱུ་ཅན་གྱིས་ངག་གི་བརྗོད་པ་ཐམས་ཅད་ཀྱང་དབྱངས་གསལ་གྱི་ཆོས་ཅན་ཡིན་པས། བརྗོད་པ་ཐམས་ཅད་རྡོ་རྗེའི་བཟླས་པར་རང་བཞིན་གྱིས་གནས་པ་ཡིན་ལ། དེའི་དེ་ཁོ་ན་
ཉིད་འོད་གསལ་བའི་རླུང་དང་། བདེ་ཆེན་ལ་སྔགས་སུ་རྣམ་པར་གཞག་པ་དག་དབུ་མར་དབྱེར་མེད་པའི་ཡན་ལག་ནི་རྡོ་རྗེའི་བཟླས་པ་སྟེ། ནང་དུ་འཇུག་བ་ༀ། གནས་པ་ཨཱཿ ཕྱིར་ལྡང་བ་ཧཱུཾ་དུ་ཤེས་པའི་སྒོ་ནས་སྐད་ཅིག་ཀྱང་མ་ཡེངས་པ་ལ་བསླབ་པར་བྱའོ། །
18-358
དེ་ལ་གོམས་ནས་ཡན་ལག་གི་རླུང་ལ་རྡོར་བཟླས་བྱ་བ་ནི། རླུང་སེམས་མིག་དང་། རྣ་བ་དང་། སྣ་དང་། ལྕེ་དང་། ལུས་ལ་འཇུག་པ་ཨོཾ་གྱི་རང་བཞིན་རིམ་པ་བཞིན་ཡུལ་འཛིན། སྒྲ་འཛིན།
དྲི་རོ། རེག་བྱ་འཛིན་པའི་རྣམ་རྟོག་འགགས་པ་མར་མེ་ནང་དུ་ཁྱེར་བས་ཕྱིའི་འོད་ནུབ་པ་ལྟ་བུ་དང་། རླུང་སེམས་ནང་དུ་གནས་པ་ཨཱཿའི་རང་བཞིན་ཡུལ་འཛིན་ལ་སོགས་པའི་རྣམ་རྟོག་ཞི་
བ་མར་མེ་མཛོད་དུ་འཇུག་པ་འོད་མི་གཡོ་བ་ལྟ་བུ། རླུང་སེམས་ཕྱི་རོལ་དུ་དབྱུང་བ་ཧཱུཾ་གི་རང་བཞིན་ཡུལ་འཛིན་སོགས་ཀྱི་རྣམ་རྟོག་རགས་པར་འཆར་བ་མར་མེ་བུ་ག་ནས་བཏོན་
པས་འོད་ཕྱིར་འབྱུང་བ་ལྟ་བུ་ལ་སེམས་གཟུང་ནས་ཉིན་ཞག་གཅིག་གི་རླུང་ཉི་ཁྲི་ཆིག་སྟོང་དྲུག་བརྒྱ་ལ་བཟླས་པར་བྱས་པས། དེ་མཐོང་བ་ཡི་འབྲས་བུ་ནི། །མྱུར་དུ་སྒྲུབ་པ་པོ་ཡིས་
འཐོབ། །དེས་རླུང་སོ་སོའི་རྒྱུ་བ་ཇི་ལྟ་བ་མཐོང་ལ། རྩ་བ་དང་ཡན་ལག་གི་རླུང་ཟིན་ཅིང་ལས་སུ་རུང་བས་ཉམས་མྱོང་དང་ཡོན་ཏན་དུ་མ་འབྱུང་སྟེ། གྲང་དུས་སུ་དྲོ། དྲོ་དུས་
སུ་བསིལ། གང་དུ་རེག་པར་བདེ་བས་ཚིམ་པ་དང་། རླུང་ཕྱི་ནང་དུ་བསྲེ་ནུས་པ་དང་། གནད་དུ་བསྡམ་པར་ཐུབ་པ་ལ་སོགས་པ་འབྱུང་ཞིང་། དེ་ནས་སྲོག་འགོག་པ་འཐོབ་སྟེ། ཞག་གཅིག་གིས་ནད་མེད་པ་དང་། 
18-359
བཅོ་ལྔས་ནམཁའ་ལ་འགྲོ་བ་དང་། ཟླ་བ་གཅིག་གིས་འཆི་མེད་ཀྱི་ཚེ་དང་། ལོ་གཅིག་གིས་སྲོག་རྩོལ་གྱི་ཡོན་ཏན་ཐམས་ཅད་སྒྲུབ་པ་པོས་ཐོབ་པར་འགྱུར་བ་ཡིན་ནོ། ། གཉིས་པ་ནི། ཡང་ན་
ཡོན་ཏན་སྐྱོན་རྣམས་ཀྱི། །རྒྱུ་ནི་སྐྱེས་པ་བུད་མེད་དེ། །དེ་བསད་པ་ཡི་རྣམ་པ་ཡིས། །མ་ནིང་འདི་ནི་རྒྱས་པར་བྱ། །གཡས་ཕྱིར་འཕོ་བ་སྐྱོན་བསྐྱེད་པའི་རླུང་དང་། གཡོན་ནང་དུ་སྡུད་པ་
ཡོན་ཏན་སྐྱེད་པར་བྱེད་པའི་རླུང་གཉིས་བསད་ནས་དབུ་མར་གཞུག་པའི་ཐབས་ལ། ལུས་ཙོག་པུར་འདུག་ལ། ལག་པ་གཉིས་རྐང་པའི་རྗེ་ངར་ལ་འཁྱུད་ལ། ཕོ་སྐད་དྲག་ལ་ཐུང་བ། མོ་སྐད་ཕྲ་
ལ་རིང་བ་གཉིས་ཏེ། ཕོ་སྐད་དྲག་ལ་ཐུང་བ་ནི་ལུས་ནམ་མཁར་ཟོ་བ་ཞབས་མེད་པ་བཞིན་དུ་ཁོང་སྟོང་ཞབས་མེད་དུ་བསྒོམས་ལ། རླུང་ཕར་གཏོང་བའི་དུས་སུ་ཧཱུཾ་ཞེས་པའི་ཚུལ་གྱིས་
དྲག་ལ་ཐུང་བར་མེས་དྲངས། ནང་དུ་འཇུག་པའི་དུས་ཨོཾ་གྱིས་ནང་དུ་གཞུག་སྟེ་ཟང་ཐལ་དུ་སང་གཏིང་ན་མར་སོང་བར་བསམ་མོ། །དེ་བཞིན་དུ་མོ་སྐད་དུ་ཕྲ་ལ་རིང་བ་བྱེད་ནའང་
ཤེས་པར་བྱའོ། །དེ་ནས་སྟེང་རླུང་མནན་འོག་རླུང་བསྡམས་པས་རྒྱུ་ཞབསུ་རླུང་ཁམ་ནག་པ་ལང་ལོང་ཅན་དུ་ལྟེང་གིས་བསྐྱིལ་བ་ནི། རླུང་འཁོར་ལོ་ལྟར་བསྐྱིལ་བའི་མན་ངག་གོ། །།
༈ ཕུང་པོའི་བདུད་གཞོམ་པ་འཛག་པ་བཅིང་བའི་སྦྱོར་བ།
གཉིས་པ་ཕུང་པོའི་བདུད་གཞོམ་པ་འཛག་པ་བཅིང་བའི་སྦྱོ་བ་ལ། 
18-360
ཐིག་ལེའི་འཕོ་བ་བགག་པ་བུམ་པ་ཅན། ཐིག་ལེ་གོ་ཟློག་ཏུ་གནོན་པ་སྲོག་ཐུར་བསྲེ་བ་གཉིས་ལས། དང་བོ་ནི། སྟན་བདེ་བ་ལ་ལུས་བཅོས་ཏེ། གྲང་བ་ཤས་ཆེ་ན་ལུས་ཙོག་པུར་
བྱས་ཏེ། ལག་པ་གཉིས་རྗེ་ངར་ལ་འཁྱུད། པུས་མོ་དང་བྲང་སྦྱར་བར་བྱའོ། །དེ་ནས་རང་ཉིད་མགོན་པོ་ཕྱག་བཞི་པ་སྟོང་རར་གསལ་བའི་ལུས་ཀྱི་དབུས་སུ་རྩ་གསུམ་འཁོར་ལོ་དྲུག་དང་བཅས་
པ་གསལ་བཏབ་པའི་སྤྱི་བོ་བདེ་བ་ཆེན་པོའི་འཁོར་ལོར་ཧཾ་དཀར་པོ་བྱང་ཆུབ་ཀྱི་སེམས་ཀྱི་རང་བཞིན་མགོ་འཐུར་དུ་བལྟ་བ་དེའི་མཐའ་མ་ན་ཕར་བྱང་ཆུབ་ཀྱི་སེམས་ཆབ་རོམ་གྱི་རྣམ་
པ་ལྟ་བུའམ་ཞུན་མར་གྱི་རྣམ་པ་ལྟ་བུ་དཀར་ཁྲེལ་ལེ་བསྒོམ། དེ་ནས་རང་གི་ལྟེ་བ་ལས་སོར་བཞིའི་ལྐོག་ཏུ་གཏུམ་མོ་ཡེ་ཤེས་ཀྱི་མེ་ཨ་ཤད་ཀྱི་རྣམ་པ་ལྟ་བུ་ཁ་དོག་
དམར་ལ་རེག་བྱ་ཚ་བ་རྣོ་བ་ཅིག་བསྒོམ། དེ་ནས་རླུང་ཕྱིར་འགྲོ་ནང་འཇུག་ལན་གཉིས་གསུམ་བྱས་ནས་རླུང་ནང་དུ་བླངས་ཏེ་གཏུམ་མོ་ལ་ཤེས་པ་གཏད་ནས་བསྒོམས་པས། གཏུམ་མོ་ཡེ་ཤེས་
ཀྱི་མེ་རེག་བྱ་ཚ་བ་རྣོ་བ་འབར་བས། སྤྱི་བོ་བྱང་ཆུབ་ཀྱི་སེམས་ཀྱི་ཧཾ་ལ་མེས་རེག་པས། ཧཾ་དེ་ལས་བྱང་ཆུབ་ཀྱི་སེམས་སྲན་མའི་རྡོག་མ་ཙམ་མམ། ཡུངས་ཀར་ཙམ་པ་ཁྲལ་ཁྲལ་བབ་པས་གཏུམ་མོའི་མེ་ཇེ་ཆུང་ཇེ་ཆུང་ལ་མར་མེ་བཟང་ཤོས་ཙམ་པ་དམར་བ་ལྟེམ་ལྟེམ་འབར་བ་ལ་བྱང་ཆུབ་ཀྱི་སེམས་སྟིམ་སྟིམ་ཐིམ་པས་བདེ་བ་ཁྲིལ་ཁྲིལ་འབྱུང་བར་བསྒོམ། 
18-361
དེ་ལ་ཉམས་སུ་མྱོང་བ་མ་སྐྱེས་ཀྱི་བར་བྱིང་བའམ་རྒོད་པར་གྱུར་ན། ཡང་གཏུམ་མོའི་མེ་འབར་བས་བྱང་ཆུབ་ཀྱི་སེམས་གྱེན་ལ་ཕུལ་ནས་སྤྱི་བོའི་བར་དུ་འབར་བར་བསྒོམས་ལ། ཡང་སྤྱི་
བོ་ནས་བྱང་ཆུབ་ཀྱི་སེམས་ལྟེ་བའི་བར་དུ་བབ་པར་སེམ་ཞིང་། འབར་འཛག་གི་དུས་ཉམས་སུ་མྱོང་བ་གང་དུ་སྐྱེས་པ་དེར་བློ་གཞག་ལ་བསྒོམ་པར་བྱའོ། །མཉམ་གཞག་ལ་དེ་ལྟར་བསྒོམས་པའི་
ཉམས་སུ་མྱོང་བ་དེས། རྗེས་ཐོབ་མིག་གིས་གཟུགས་མཐོང་བ་ཐམས་ཅད་ལ་བདེ་སྟོང་དབྱེར་མེད་དུ་སྦྱར་ཞིང་། དེ་བཞིན་དུ་རྣ་བས་སྒྲ་ཐོས་པ་དང་། སྣས་དྲི་ཚོར་བ་ལ་སོགས་པ་ཐམས་ཅད་
བདེ་སྟོང་དབྱེར་མེད་དུ་སྦྱར་ཞིང་བསྒོམ་མོ། །དེ་ལྟར་ཡང་དང་ཡང་དུ་བསྒོམས་པས་དུས་ཚོད་གཅིག་རྩ་ན་མཉམ་གཞག་རྗེས་ཐོབ་མེད་པར་ཐམས་ཅད་བདེ་སྟོང་དབྱེར་མེད་དུ་ཉམས་སུ་མྱོང་བ་ཁྲིལ་
ཁྲིལ་འབྱུང་སྟེ། དེའི་དུས་སུ་ལུས་ལ་གོས་མི་དགོས་པ་དང་། ཟས་མ་ཟོས་ཀྱང་མི་ལྟོགས་པ་དང་། མང་དུ་ཟོས་ཀྱང་ཡོག་པ་དུག་དང་མཚོན་གྱིས་མི་ཚུགས་པ་འབྱུང་། དེའི་དུས་སུ་སྐུའི་སྒོ་
དགུ་འགག་པ་དང་། གསུང་གི་སྒོ་བཞི་འགག་པ་དང་། ཐུགས་ཀྱི་སྒོ་གཉིས་བྱེ་བ་འབྱུང་ངོ་། །གཞན་ཡང་རྟགས་ལྔ་དང་ཕན་ཡོན་བརྒྱད་ལ་སོགས་པའི་ཡོན་ཏན་ཡང་འབྱུང་། དེ་ལ་སྐུའི་སྒོ་དགུ་འགག་པ་ནི། 
18-362
སྒོ་དགུ་ནས་རྣམ་རྟོག་གི་རླུང་མི་རྒྱུ་བར་འགག་སྟེ། རང་རྒྱུད་དུ་འཛིན་པ་ལ་སོགས་པའི་རྣམ་པར་རྟོག་པ་ཐམས་ཅད་ནུབ་ནས། བདེ་སྟོང་དབྱེར་མེད་ཀྱི་ཉམསུ་མྱོང་བ་འཆར་རོ། །གསུང་གི་
སྒོ་བཞི་འགག་པ་ནི། རླུང་སེམས་ཨ་ཝ་དྷུ་ཏཱིར་ཚུད་པས་འབྱུང་བ་བཞིའི་རླུང་མི་རྒྱུ་བའོ། །ཐུགས་ཀྱི་སྒོ་གཉིས་བྱེ་བ་ནི། རྣམ་རྟོག་སྤངས་པའི་རྟགས་སུ་སྙིང་ཀ་ན་རྩ་ཐམས་ཅད་འདུས་
པའི་རྩ་སྣ་དེ་ཁ་བྱེ་ནས་འོང་སྨིན་མཚམས་ན་རྩ་ཐམས་ཅད་འདུས་པའི་རྩ་སྣ་དེ་ཁ་བྱེ་ནས་འོད་ངོ་། །དེ་ནས་མཁའ་གྲོ་མའི་ལུང་བསྟན་འབྱུང་སྟེ། བརྟན་པ་སོགས་དབྱུང་བར་བྱ་བའི་
ཕྱིར་ཕྱག་རྒྱ་ཁྲིད་ནས་སྤྱོད་པ་བྱ། དེ་ནས་སྒྲུབ་པ་ཞག་གཅིག་བྱས་པས་སྲོད་ལ་བདུད་བཏུལ་ནས་ཐོ་རངས་མངོན་པར་རྫོགས་པར་འཚང་རྒྱའོ། །དེ་ཡང་། མ་ནིང་རིན་ཆེན་རྒྱས་གྱུར་ན། །གསེར་གྱི་
རི་བོ་རྩེ་ལ་འཁྱེར། །ཡོན་ཏན་མ་ལུས་ཕུན་ཚོགས་པ། །དེ་ལས་འབྱུང་བར་ཐེ་ཚོམ་མེད། །མ་ནིང་ནི་དབུ་མའི་རླུང་། །རིན་ཆེན་ནི་ཐིག་ལེ་སྟེ། འོག་ཏུ་འཕོ་བ་འགགས་པས་སྟེང་རླུང་རྒྱས་
པར་འགྱུར་ཏེ་གསེར་གྱི་རི་བོ་སྨིན་མཚམས་ཀྱི་རྩ་འཁོར་གྱེན་དུ་རེངས་ནས། དེ་བྱང་ཆུབ་ཀྱི་སེམས་ཀྱིས་གང་བས་རྣམ་པ་ཐམས་ཅད་མཁྱེན་པའི་སངས་རྒྱས་སུ་འགྱུར་བ་ཡིན་ནོ། །དེ་ལྟར་སྦྱོར་བ་འདི་རྣམས་གྱི། །
18-363
རྟེན་ནི་འདི་རུ་བཤད་པར་བྱ། །གསུམ་པོ་འདུས་དང་ཕྱེ་བ་ཡིས། །དྲུག་དང་ལྔ་ནི་གོ་རིམ་བཞིན། །སྟེང་འོག་བར་དུ་ཕྱེ་བ་ཡིས། །དེ་ནི་སོ་སོར་རྣམ་གཉིས་འདོད། །ཤེས་བྱའི་ངོ་བོ་ཉིད་
རྣམས་ནི། །དེ་ཕྱིར་རྣལ་འབྱོར་པས་ཤེས་བྱ། །རྩ་གསུམ་འདུས་པ་དང་ཐ་དད་དུ་བྱེ་བ་ལས་འཁོར་ལོ་དྲུག་གམ། དཔྲལ་བར་ཟུག་པའི་འཁོར་ལོ་སྤངས་པའི་ལྔ་ནི་རྣལ་འབྱོར་འདི་བསྒོམ་པའི་རྟེན་
དུ་བཤད་པ་ཡིན་ནོ། ། གཉིས་པ་ཐིག་ལེ་གོ་ཟློག་ཏུ་གནོན་པ་སྲོག་ཐུར་བསྲེ་བ་ནི། ཁམས་བསངས་ལ་སྟན་བདེ་བ་ལ་སེམས་སྐྱིལ་མ་གཏོགས་གཞན་གོང་བཞིན་དུ་ལུས་བཅོས་ཏེ། རང་ལྷའི་སྐུར་
གསལ་བའི་སྨིན་མཚམས་ནས་གྱེན་དུ་འཁྱོགས་ནས་རྡོ་རྗེ་ནོ་བུའི་རྩེ་མོའི་བར་དུ་ཟུག་པའི་ཨ་ཝ་དྷཱུ་ཏཱི་ཁ་དོག་དམར་པོ་མདའ་སྨྱུག་འབྲིང་པོའི་ཚད་ཙམ་བཙང་གི་བུག་མ་ལྟར་སྟོང་སང་
ངེ་བའི་མར་སྣར་རླུང་སེམས་འདྲེས་པའི་ཐིག་ལེ་དཀར་པོ་སྣུམ་ལ་འཚེར་བ། ཟླུམ་ལ་འདྲིལ་བ། བདེ་རིལ་རིལ་བ་རྒྱ་སྲན་ཙམ་གཅིག་གསལ་བཏབ་ནས། ཧཱུཾ་ཧཱུཾ་ཞེས་པའི་དབུགས་ཀྱིས་མཁལ་ཁུང་གཉིས་
འུབ་འུབ་ཡར་འཐེན་ཞིང་དྲངས་པས་ཀ་བ་ཚུགས་པ་ན། རྡོ་རྗེ་ནོར་བུ་ནས་ཐིག་ལེ་དེ་རླུང་གི་ལྕགས་ཀྱུས། དབུ་མའི་ནང་ལས་རིམ་གྱིས་གསེར་སྒོའི་ཐད་ལས་ཕྱིར་ཐོན་པར་བསམས་ལ་རླུང་ཕྱིར་འབུད་དྲག་པོར་བརྔུབས་པའི་ཚེ་ཐིག་ལེ་དེ་ཨ་ཝ་དྷཱུ་ཏཱིའི་ནང་ན་མར་སོང་ནས་རྡོ་རྗེ་ནོར་བུའི་ཕྱི་རོལ་དུ་སྐར་མདའ་འཕངས་པ་བཞིན་སོང་བར་བསམས་ལ་འཁོར་མོ་ཉིད་དུ་ཉིན་ཞག་གསུམ་དུ་བསྒོམས་པས་སྲོག་ཐུར་གོང་བུ་གཅིག་ཏུ་འདྲེས་ནས། 
18-364
དཀར་ཆ་ཐུར་སེལ་གྱིས་འཐུར་དུ་འབྱིན་པའི་བྱ་བ་མི་བྱེད་པར་སྟེང་དུ་མནན། དམར་ཆ་སྲོག་གིས་སྟེང་དུ་འཛག་བའི་བྱ་བ་མི་བྱེད་པར་འོག་ཏུ་གནོན་པས་རླུང་གཉིས་ཀྱི་བྱེད་ལས་གོ་
ཟློག་པའི་ཕྱིར་གནས་ལས་འདོན་པ་ཞེས་བྱ་ཞིང་། སྐབས་འདིར་སྐྱེས་པས་སྲོག །བུད་མེད་ཀྱི་ཐུར་སེལ་བརྗོད་དེ། ཡང་ན་ཡོན་ཏན་སྐྱོན་རྣམས་ཀྱིས། །རྒྱུ་ནི་སྐྱེས་པ་བུད་མེད་དེ། །གནས་འདི་ཉིད་ནས་
གདོན་པར་བྱ། །དེ་བཏོན་དེ་ལ་དགོས་པ་ནི། །འབྲས་བུ་ཐམས་ཅད་འབྱུང་བར་འགྱུར། །ཞེས་པས་སོ།། །།
༈ འཆི་བདག་གི་བདུད་གཞོམ་པ་བཅུད་ཀྱིས་ལེན་པའི་སྦྱོར་བ།
གསུམ་པ་འཆི་བདག་གི་བདུད་གཞོམ་པ་བཅུད་ཀྱིས་ལེན་པའི་སྦྱོར་བ་ལ། རྒས་པ་གཞོམ་པ་རླུང་
ཟས་སུ་ཟ་བ། འཆི་བ་སྐྱེངས་སུ་གཞུག་པ་བདུད་རྩི་སྐོམ་དུ་བཏུང་བ་གཉིས་ལས། དང་པོ་ནི། ནམཁའ་རྒྱ་ཆེ་བ་མཐོང་བའི་སར་ལུས་གནད་སེམས་སྐྱིལ། ལག་གཉིས་པུས་བཀབ་ཏུ་བྱས་ཏེ། རླུང་
རོ་ཕྱིར་དྲག་ལ་རིང་བ་ཐེངས་གསུམ་བུས། ངག་ཧུ་ཧུབ་ཅེས་སྒྲ་བཅས་ཁ་ནས་རྔུབ་པའི་ཚེ། ཕྱི་རོལ་གྱི་ནམཁའ་བདུད་རྩིའི་རང་བཞིན་དུ་སྔོ་ལྟེམ་ལྟེམ་ཞུ་ནས། ཁའི་ནང་ནས་ཞུགས་ཏེ་ལུས་
ཐམས་ཅད་གང་བར་བསམ་པ་དང་བསྟུན། རྩོལ་བས་མཆིལ་མ་སྒྲ་བཅས་སུ་མིད་དོ། །ལུས་རླུང་གིས་གང་བར་གྱུར་གྱི་བར་དུ་བྱའོ། །དེ་ནི་ཚེ་འཕེལ་ཞིང་ལུས་མི་རྒས་པའི་མཆོག་ཏུ་འགྱུར་རོ། །
18-365
དེའི་ཚེ་རྒྱབ་རླུང་རང་མལ་དུ་བཞག་ལ་འདོར་བ་ནི་སྤང་བར་བྱའོ། །སའི་བཅུད་སེར་པོ། ཆུའི་དཀར་པོ། མེའི་དམར་པོ། རླུང་གི་སྔོན་པོའོ།།ཡང་ན་ཕོ་མོ་མ་ནིང་གི །གནས་འདི་ཉིད་དུ་
གཞུག་བྱས་ལ། །དེར་གཞུག་དེ་ལ་མྱོས་བྱེད་བླུད། །བླུད་ནས་སྐྱེས་པ་བུད་མེད་ཀྱིས། །འབད་པས་མ་ནིང་ཁར་གཞུག་བྱ། །དེ་བཞིན་བྱས་གྱུར་དཔག་བསམ་ཤིང་། །འདྲ་བར་འདི་ནི་ཐེ་ཚོམ་མེད། །གཉིས་པ་
ནི། ལུས་གནད་དེ་ལས་ལྐོག་མ་དང་མིད་པ་མདུན་དུ་བརྒྱས་ནས། ལྕེའི་རྩེ་མོས་བསྒུལ་བའི་མཆིལ་མ་སྒྲ་བཅས་སུ་མི་པ་དང་བསྟུན། ལྕེའུ་ཆུང་གི་དབུས་སུ་ཟླ་བའི་སྙིང་པོ་ལྟར་དཀར་བའི་
བདུད་རྩིའི་ས་བོན། ཙ་ན་ཀའི་ཚད་ཙམ་པའི་ཐིག་ལེ་ལས་བདུད་རྩིའི་རྒྱུན་ཆིལ་ཆིལ་བབས་པས་ལུས་འོ་མས་གང་བའི་སྣོད་ལྟ་བུར་བསམ་ཞིང་། ཁོང་པའི་ནང་རླུང་གིས་གང་བ་དང་མནན་པར་
བྱའོ། །ཡང་ན་ལྕེའུ་སྦྱོར་བས། རྡོ་རྗེ་ལྕེ་ཡིས་བསྐྱོད་པར་བྱ། །དེ་བསྐྱོད་དེ་ལ་བདུད་རྩིའི་རྒྱུན། །འབབ་འགྱུར་འདི་ལ་ཐེ་ཚོམ་མེད།། །།
༈ ལྷའི་བུའི་བདུད་གཞོམ་པ་སྒྱུ་འཕྲུལ་གྱི་སྦྱོར་བ།
བཞི་པ་ལྷའི་བུའི་བདུད་གཞོམ་པ་སྒྱུ་འཕྲུལ་གྱི་སྦྱོར་བ་ལ།
ལྷའི་གཟུགས་གོམས་པར་བྱ་བ་དང་། མངོན་པར་འདོད་པ་སྒྲུབ་པ་གཉིས་ལས། དང་པོ་ནི། རབ་ཀྱིས་སྐད་ཅིག་གིས་ལྷར་ལྡང་བའམ། འབྲིང་པད་ཉིའི་སྟེང་དུ་ཧཱུཾ་ཡིག་ཡོངསུ་གྱུར་པ་ལས་སམ། ཐ་མས་པད་ཉི་དང་རོ་སྐམ་རློན་གྱི་གདན་ལ་ཧཱུཾ་ཡིག་མཐིང་ནག །
18-366
དེ་ལས་འོད་འཕྲོས་གདུག་པ་ཅན་ཚར་བཅད། ཚུར་འདུས་པ་ལས་རྡོ་རྗེ་གྲི་གུག་ལྟེ་བ་ལ་ཧཱུཾ་གིས་མཚན་པའི་འོད་ཀྱིས་དྲེགས་པ་ཅན་གྱི་ནུས་མཐུ་བསྡུས། ཡོངསུ་གྱུར་པ་ལས། རང་ཉིད་དཔལ་
ཡེ་ཤེས་ཀྱི་མགོན་པོ་སྐུ་མདོག་མཐིང་ནག་བ་སྤུའི་བུ་ག་ནས་རྡོ་རྗེའི་རྡུལ་ཕྲ་མོ་དང་།སྤྲུལ་པའི་ཁྲོ་ཆུང་མཚོན་ཆ་སྣ་ཚོགས་ཐོགས་པ་འཕྲོ་བ་ཤིན་ཏུ་ཁྲོས་པའི་ཞལ་མཆེ་བ་གཙིགས་
ཤིང་ཧ་ཧ་དང་ཧཱུཾ་ཧཱུཾ་ཕཊ་ཕཊ་ཀྱི་སྒྲ་སྒྲོགས་པ། སྤྱན་གསུམ་མེའི་ཕུང་པོ་ལྟར་དམར་བ། དབུ་སྐྲ་དང་སྨིན་མ་དམར་སེར་གྱེན་དུ་བརྫེས་པ། ཕྱག་བཞིའི་དང་པོ་གཉིས་བེ་ཏའི་འབྲས་བུ་
དང་། བདུད་བཞིའི་ཁྲག་གིས་གང་བའི་ཀ་པཱ་ལ་ཐུགས་ཀར་སྟེང་འོག་ཏུ་འཛིན་པ། འོག་མ་གཉིས་རལ་གྲི་དང་ཁ་ཊཱཾ་ག་བསྣམས་པ། ཤིན་ཏུ་བརྗིད་པའི་སྐུ་ཕྱག་རྒྱ་དྲུག་དང་། སྦྲུལ། དུར་ཁྲོད་
ཀྱི་ཆས་བརྒྱད་ཀྱིས་ལེགས་པར་བརྒྱན་པ། ཡེ་ཤེས་ཀྱི་མེ་རབ་ཏུ་འབར་བའི་ཀློང་ན་བཞུགས་པ། མེ་ལོང་དྲི་མ་མེད་པའི་གཟུགས་བརྙན་ལྟ་བུ་སྐད་ཅིག་གིས་བལྟས་ལ་གསལ་བར་མ་གྱུར་གྱི་
བར་དུ་སེམས་གཟུང་། དེ་ལས་གཟུགས་བརྙན་གསལ་བ་སྣང་བ། དེ་ནས་གཟུགས་བརྙན་ལོགསུ་ཆད་པ་ལྟར་སྣ་བ་སྣང་བ་མཆེད་པ། དེ་ནས་གཟུགས་བརྙན་དེ་ཉིད་མི་གསལ་བ་ནག་ཐེབས་ཏེ་སོང་བ་ཉེར་ཐོབ། 
18-367
དེ་ནས་དངས་པ་ནམཁའ་ལྟ་བུའི་ངང་ནས་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ཀྱི་གཟུགས་བརྙན་མཐའ་ཡས་པ་འཆར་བར་འགྱུར་རོ། །དེའི་གསལ་སྣང་བརྟན་པར་གྱུར་པ་ན་སྣང་སྲིད་
ཀྱི་དངོས་པོ་ཐམས་ཅད་ལྷའི་གཟུགས་སུ་སྤོས་ཀྱིན་བསྒོམས་པས་བརྟན་པ་ཐོབ་སྟེ་མཉམ་རྗེས་མེད་པ་འབྱུང་ངོ་། ། གཉིས་པ་ནི། རང་ཉིད་ལྷར་གསལ་བའི་སྙིང་གའི་ནང་རྩ་པདྨ་འདབ་མ་བཞི་པའི་དབུས་
སུ། དཔའ་བོ་ཧ་རུ་ཀའི་རང་བཞིན་ཧཱུཾ་ཡིག་མཐིང་ནག་སྦུ་གུ་ཅན་སྤུ་ཤད་ཀྱིས་བྲིས་བ་ལྟ་བུར་ཕྲ་བ་བསྒོམས་ལ་སྟེང་རླུང་མནན། འོག་རླུང་བསྡམས་པས་རླུང་གི་ཞབས་ཀྱུའི་སྤུ་གུ་ནས་
ཞུགས་ཏེ་ཧཱུཾ་གི་ནང་དུ་སིབ་སིབ་ཐིམ་པར་བསྒོམས་ལ་རྩེ་གཅིག་ཏུ་དམིགས་ན་ལུས་འདར་བ་དང་། འཕར་བ་དང་། བདེ་བས་མི་བཟོད་པ་ལྟ་བུའི་ཉམས་འབྱུང་ཞིང་། དེའི་ཚེ་ཕྱི་རོལ་གྱི་དངོས་
པོ་ཐམས་ཅད་རླུང་གི་རང་བཞིན་དུ་བདག་ལ་ཐིམ། བདག་ཉིད་ཀྱང་ཧཱུཾ་ལ་ཐིམ། ཧཱུཾ་ཡིག་ཇེ་ཕྲ་ཇེ་ཕྲར་གྱུར་ནས་དམིགས་པ་མེད་པའི་ངང་དུ་མཉམ་པར་གཞག་པས། རྣམ་པ་ཐམས་ཅད་ནུབ་
པའི་ཤེས་པ་གསལ་སྟོང་ནམཁའ་དངས་པ་ལྟ་བུ་ཤར་ནས། དེའི་ངང་ལས་སྣང་གཞི་གཅིག་ཏུ་གྱུར་པའི་ཟུང་འཇུག་ཡེ་ཤེས་ཀྱི་སྐུར་ཡང་དག་པར་ལྡང་བར་འགྱུར་རོ། །ཡང་ན་སྐུ་གཟུགས་རྫོགས་པས་སམ། །
18-368
ཡང་ན་ས་བོན་ཚོགས་ཀྱིས་སྤྲུལ། །ཡང་ན་ཆོ་ག་གསུམ་སོགས་སོ། །ལྷ་ཡི་གཟུགས་ནི་གོམས་པ་ཡིས། །མངོན་པར་འདོད་པ་བསྒྲུབ་པར་བྱ། །དེ་ལྟར་བསྒོམ་པར་བྱ་བ་དེ་དག་ཀྱང་དམ་ཚིག །སྦྱོར་
བ་རིན་ཆེན་འདི་རྣམས་ལ། །སྦྱིན་དང་ཚུལ་ཁྲིམས་སྙིང་བརྩེ་ཆེ། །ཐོག་མར་རབ་ཏུ་འབད་པ་ཡིས། །དེ་ལ་གོམས་པ་ཡང་ཡང་བྱ། །ཞེས་པ་དང་ལྡན་པས་བསྐྱང་བར་བྱའོ། །ཚུལ་འདི་ཀུན་རྫོབ་ཀྱི་
དངོས་གྲུབ་ཙམ་སྒྲུབ་པའི་ཆེད་དུ་མ་ཡིན་ཏེ། འདི་ནི་རྒྱུད་རྣམས་ཐམས་ཅད་དང་། །མདོ་སྡེ་རྣམས་ནི་ཐམས་ཅད་ལས། །སངས་རྒྱས་རྣམས་ཀྱི་སྙིང་པོར་གསུངས། །དོན་དམ་པ་ཡི་སྒྲུབ་ཐབས་སོ།། །།
༈ བདུད་བཞི་ཅིག་ཅར་དུ་གཞོམ་པ་བཙན་ཐབས་ཀྱི་སྦྱོར་བ།
ལྔ་པ་
བདུད་བཞི་ཅིག་ཅར་དུ་གཞོམ་པ་བཙན་ཐབས་ཀྱི་སྦྱོར་བ་ལ། ཕྱག་རྒྱའི་རྣལ་འབྱོར་བཤད་པ། དེའི་འབྲས་བུ་བྱེ་བྲག་ཏུ་བསྟན་པ་གཉིས་ལས། དང་པོ་ནི། རང་མགོན་པོར་བསྐྱེད། ཕྱག་རྒྱ་མ་མཚན་
དང་ལྡན་པ་བཀུག་ལ་ཡུམ་ཙཎྚི་ཀར་བསྐྱེད་དེ། ཡབ་ཡུམ་སྦྱོར་བའི་རང་གི་རྡོ་རྗེ་ནོར་བུའི་རྩ་བ་དང་། བཤང་ལམ་གྱི་བར་མདོམས་ཀྱི་ནང་དུ་རླུང་སེམས་འདྲེས་བའི་ཐིག་ལེ་གཅིག་བསྒོམས་ནས།
བདེ་བའི་ཐིག་ལེ་ལ་སེམས་གཏད། བདེ་བ་སྐྱེས་པ་དང་བདེ་བ་དེ་ཕྱག་རྒྱ་མ་མེད་པར་རང་གི་ལུས་ལ་བསྒོམ། དེ་ལ་འབྱོངས་ནས་ཡང་ཕྱག་རྒྱ་མ་དང་སྦྱར་བས་སྙོམས་འཇུག་བྱ་སྟེ། 
18-369
ཐིག་ལེ་མང་པོ་འབྲོས་པས་རང་གི་ལུས་ལ་བསྒོམ་མོ། །དེ་ནས་བདེ་བ་ཚད་དུ་ཕྱིན་ནས་ཏེ་ཕྱག་རྒྱ་མ་ལ་བདེ་བ་རྫོགས་པ་དང་ཁྱད་པར་མེད་པར་རང་གི་ལུས་བདེ་བར་བསྒོམས་
པས། དེ་དང་འགྲན་ཐུབ་པར་བྱུང་ན་ཕྱག་རྒྱ་མ་དང་མི་སྦྱར་བར་བསྒོམ། བདེ་བ་དེ་ཅུང་ཟད་ཉམས་སུ་བདོག་ན་ཕྱག་རྒྱ་མའི་ནུ་མ་དང་བྷ་ག་ལ་བལྟ་ཞིང་བསྒོམས་པས་བདེ་བ་
ཚད་དུ་འབྱུང་ངོ་། །དེ་བཞིན་དུ་བྱུང་ན་ཕྱག་རྒྱ་མ་ཡོལ་བའི་ཕྱི་རོལ་དུ་བཞག་ཅིང་བསྒོམ་མོ། །ཉམས་སུ་བདོག་ན་ཕྱག་རྒྱ་མའི་སྐད་ཉན་ཅིང་དེ་དང་ཆགས་པའི་གཏམ་གྱིས་སྔར་བཞིན་འོང་
ངོ་། །དེ་ལ་འབྱོངས་ནས་མི་འཆོར་བར་འདུག་ན་ཕྱག་རྒྱ་མ་ལ་ཡོན་ཕུལ་ཏེ་བཏང་ངོ་། །གཉིས་པ་ནི། ཚུལ་དེས་བདེ་བ་ཆེན་པོ་ཉམས་སུ་མྱོང་ནས་གཉིད་སད་པའི་གནས་སྐབས་སྐྱེད་པར་བྱེད་
པའི་ལུས་ཀྱི་ཐིག་ལེ་འཛག་མེད་དུ་བཅིངས་པས་འདུ་བྱེད་ཀྱི་ཕུང་པོ་སྒྲིབ་བྲལ་དུ་བྱེད། སྙིང་གར་གཉིད་ལོག་པའི་གནས་སྐབས་སྐྱེད་པར་བྱེད་པའི་སེམས་ཀྱི་ཐིག་ལེ་འཛག་མེད་དུ་བཅིངས་པས་ཚོར་
བ་དང་འདུ་ཤེས་ཀྱི་ཕུང་པོ་སྒྲིབ་བྲལ་དུ་བྱེད། མགྲིན་པར་རྨི་ལམ་གྱི་གནས་སྐབས་སྐྱེད་པར་བྱེད་པའི་ངག་གི་ཐིག་ལེ་འཛག་མེད་དུ་བཅིངས་པས་གཟུགས་ཕུང་དང་རྣམ་ཤེས་སྒྲིབ་བྲལ་དུ་བྱེད། 
18-370
སྤྱི་བོར་ཡེ་ཤེས་ཀྱི་ཐིག་ལེ་བཞི་པའི་གནས་སྐབས་སྐྱེད་པར་བྱེད་པ་འཛག་མེད་དུ་བཅིངས་པས་དབང་པོ་དྲུག་སྒྲིབ་བྲལ་དུ་བྱེད་ལ། དེ་སྒྲིབ་པ་དང་བྲལ་བས་ཡུལ་དྲུག་དང་རྣམ་ཤེས་དྲུག་
ཀྱང་སྒྲིབ་པ་དང་བྲལ་བས། སྐྱེ་མཆེད་བཅུ་གཉིས་དང་ཁམས་བཅོ་བརྒྱད་སྒྲིབ་བྲལ་དུ་བྱས་པའོ། །དེ་ཡང་། ཡང་དག་པར་ནི་བསྟེན་པ་ཡིས། །སློབ་མ་བཟང་པོ་དེ་ལ་ནི། །བླ་མས་རང་གི་ཉམས་
མྱོང་བསྟན། །སྦྱོར་བའི་འཕྲེང་བ་འདི་རྣམས་ལ། །དེ་ཉིད་རིན་ཆེན་རབ་སྦྱོར་བྱ། །དེ་ཉིད་རིན་ཆེན་མ་ཐོབ་ན། །དངོས་གྲུབ་ཉིད་ནི་ཇི་ལྟར་ཐོབ། །དེ་བས་སློབ་མ་བཟང་པོ་ཡིས། །འདོད་པས་བླ་
མ་རྟག་ཏུ་མཆོད། །གང་ཕྱིར་བླ་མ་མཉེས་པ་ཡིས། །དེ་ཉིད་རིན་ཆེན་རབ་ཏུ་བསྟན། །དེ་ཉིད་རིན་ཆེན་ནི་འགྱུར་བ་ཐམས་ཅད་ཟད་པའི་འགྱུར་བ་མེད་པའི་བདེ་བ་ཕྱག་རྒྱའི་ལམ་ལས་རྙེད་
པ་སྟེ། དེ་ཡང་བླ་མ་དམ་པ་ཡོངསུ་མཉེས་པར་བྱས་པ་ལས་ཡིན་གྱི། གཞན་དུ་ནི་ཕོ་ཉ་རལ་གྲིའི་འཁོར་ལོ་དང་འདྲ་བས་སོ།། །།
༄། །རྗེས་ཀྱི་ཆོ་ག།
གསུམ་པ་རྗེས་ནི། དེ་ལྟར་ཡོངསུ་ཤེས་པའི་བླ་མས་
ཀྱང་ཐམས་ཅད་ལ་བཤད་པར་བྱ་བ་མ་ཡིན་ཏེ། རིན་ཆེན་གང་ཟག་ཤེས་བྱས་ལ། འབད་པས་དེ་ཉིད་བརྗོད་པར་བྱ། པདྨ་དཀར་སོགས་སློབ་མ་ལ། །ཚིག་ཙམ་ཡང་ནི་བརྗོད་མི་བྱ། །འདི་ནི་རབ་ཏུ་འབད་པ་ཡིས།།
18-371
མན་ངག་འཁྲུལ་པར་མ་གྱུར་ཕྱིར། །བླ་མ་སྣ་ཚོགས་མན་ངག་ནི། །མཁས་པ་སངས་རྒྱས་གྲགས་པས་བྱས།།པཎྜི་ཏ་བསོད་སྙོམས་པ་ཆེན་པོ་སངས་རྒྱས་གྲགས་པས། ཤྲཱི་ན་ལནྡའི་གཙུག་ལག་ཁང་དུ། སཾསྐྲྀ་
ཏའི་སྐད་དུ་མཛད་པ་ལས། དགེ་ཚུལ་ཤེས་རབ་དཔལ་གྱིས་བསྒྱུར་བའོ། །གང་འདིར་སྐལ་བཟང་རྣམས་ཀྱི་རྣ་རྒྱན་དུ། །བླ་མའི་མན་ངག་བ་ཀྐུ་ལ་ཤིང་གིས། །མེ་ཏོག་གསར་པའི་དོག་པ་སྟེར་མཁས་
པ། །གྲུབ་པའི་འཕྲེང་བརྒྱུད་མཁན་དེ་པད་དཀར་ལོ། །གཞུང་ལུགས་ཁེངས་ལྡན་མ་ཡི་ཁེངས་བཏང་ནས། །ཚིག་དོན་འདོད་པས་དབང་མེད་བདག་ཡིད་ཀྱི། །མཛའ་བོ་དང་བར་བྱས་ཚེ་མན་ངག་གི །སིནྡྷུ་ཝ་རའི་
མེ་ཏོག་རྣམ་རྒོད་བཞིན། །དེ་ཡང་མཁས་པ་ཆེན་པོ་ཙ་མི་སངས་རྒྱས་གྲགས་པས་མཛད་པའི་ནག་པོ་ཆེན་པོའི་མན་ངག་སྦྱོར་བའི་འཕྲེང་བ་ཇི་ལྟ་བ་བཞིན་དུ་ཕྱེ་བ་འདི་ཡང་། འཇམ་དབྱངས་
དགྱེས་བའི་བཤེས་གཉེན་པདྨ་དཀར་པོས་ལོ་གྲོ་མོག་པ་ལྷ་རྩེའི་རི་ཁྲོད་དུ་སྦྱར་བ་རྫོགསོ།། །།སརྦ་མངྒ་ལཾ།།

